السلام عليكم ورحمة الله وبركاته
هذي قصيده شاركت بها في مسابقة الولاء والوفاء التي اختتمت قبل يومين بوادي الدواسر بتنظيم صحيفة وادي الدواسر الإلكترونية ، ولم يحصل لها نصيب مع المشاركات الفائزة ، ومادامت كتبت في خادم الحرمين الشريفين وفي وطننا الغالي فأعتبرها فائزة وكذلك الإخوان اللذين لم يحالفهم الحظ.
زان القصيد وزان بدعه وهلّه = في موقف مافيه للعذر تبرير
في محفل وادي المعزه محله= وادي الدواسر والرجال المناعير
سيف الجزاله لاحضرنا نسلّه = بين السيوف اللامعات البواتير
سيف ذخرته لين وقته وحلّه = إلين لاحت في سمانا التباشير
بقدوم شيخ كلنا فدوة له = اللي يقول بخير مادمتوا بخير
عنّا ثقيل حمول بقعاء يشلّه = ويوّرد الضميان لا جمة البير
سحاب جوده كل حين يهله= لين أصبحت جرد الفيافي مخاضير
عاش الزعيم اللي تظلل بظله= كل العرب لاجاء للاحوال تغيير
لاجاء نهار فيه للوضع خله = تنصاه شيخان العروبة طوابير
إلى إنعقد حبل المصاعب يحله = يسوق مال وجاه ويحث ويشير
طيبه وجوده والشجاعه جبلّه = ماله شبيه من عصر سالم الزير
وحنّا جنود ماتعرف المذله = يبشر بنا في ساعة الشر والخير
دون الوطن مثل الجبال المطلّه = نرسي كما ترسي أبانات والنير
يموت من ينوي وطنا بغله = ويحيا الوطن ويدوم عز المشاهير
آل السعود اللي لها المجد كله = ويدوم عبدالله زبون المخاسير