سلام مني ياحضور الرجاجيل=في حفلةٍ فيها تصاغ القوافي
في حفلة ابن خليفة مفني الحيل=يوم السنين المجذبات العجافي
ناصر اليا عدو هل الكيف والهيل=فعله على راس الطويلة يشافي
وجده من اهل الفعل في ماضي الجيل=من اهل الثمان موردين الرهافي
لي لابةٍ في فعلها يطفح الكيل=محدٍ عطانا النايفات السهافي
وضحٍ عليهن نص الامة مغاليل=من دونهن خضر النمش يا مكافي
بيدين خطلانٍ تصد المقابيل=والجرح منهم مايرافيه رافي
يتلون أخو فرجة زعيم الحلاحيل=شيخٍ ولد شيخ وقرمٍ سنافي
ويفرح بنا النشر المطرف ليا شيل=لا طوحن بيض الصبايا الغدافي
نلحق على اللي كنهن المحاحيل=ونرد معها القوم ردٍ خلافي
وناصر مناسبٍ له رجالٍ مشاكيل=ترعى الطرف ماهيب منه تخافي
خيالة الحرشا ليا قيل ماقيل=الارواح تجلب دون حم الشعافي
قلته وانا ابن دهيم جزل التماثيل=وجداني اللي يحتمون المقافي
نحمى عقاب الجيش ونعقر الخيل=وندق خشم اللي بخشمه رعافي
والفعل مابين الرجاجيل قنديل=ماكل يومٍ فيه برد وعوافي
وصلاة ربي عد وبل الهماليل=عداد همالٍ على الارض ضافي
على نبيٍ فصل العلم تفصيل=تفصيل علمٍ ماخفى منه خافي
صح لسان ابودهيم واعتلى شانه ويستاهل الممدوح ونسابته ولاهنت يابوهادي على النقل الرائع |