توديع حضرة جنابه
***
دمعي تهشّم في ثرى العود هتّان
وكلٍ بكى توديع حضرة جنابه
*
بــ الهون ياقبرٍ نزل فيه سلطان
بشويش ضمّه واحضنه في حبابه
*
شف وجه الأرض احزانه أشكال وألوان
متخالطٍ فيه العــزا والمهـابه
*
يادمعتي هاتي من الدمع ودّآن
الوسم مقبل وآمطري ياسحابه
*
على رفيع المنزله عالي الشأن
اللي لـ حاله دوم ماله مشابه
*
كان الكريم اللي له الجود عنوان
وكان العطوف اللي يحنّ برحابه
*
يالله أنا راجيك في سر وإعلان
تجبر عزانا به وترحم ترابه
*
واحفظ لنا السيفين نايف وسلمان
في ظل من يرجي ويحسب حسابه
*
عبدالله اللي يتعب الإنس والجان
النادر الشهم العزيز المجابه
*
أبوالجميع وشذرة السيف شامان
الله .. لا يكتب علينا غيـابه
*
.
.
شعر : سامي بن محمد الـأحمد السديري
المصدر : جريدة الشرق الأوسط
السبت 9 / 12 / 1432هـ