السلام عليكم ورحمة الله وبركاته ،،،
قصيدة للشاعر فلاح القرقاح ،، عسى نقلي أن ينال رضاكم ،،
يا وجودي كل ما نسنس بـراد العصيـر=وجد مـن قفـو بـذوده وهـو مثناتهـا
اكنفوا به لين حن ورغـا عقـب الهديـر=سربـة مـا عاقهـا الله مــن نياتـهـا
اثلموه اخوان شما وهـو سيـف شطيـر=وعصبته ما تنصـر المنتخـي فزعاتهـا
وسمهم لا ما عترض له على ورك البعير=ما بقاله من عصـا العـز غيـر لحاتهـا
مـا وراه الا يتيـم يقـدي لـه ضريـر=مع فروع لو ضوى الذيب طـق بشاتهـا
ساقوا اتلى ذود ابوها وهو للقـوم أسيـر=ليـن وطيـت جـرة ابوانهـا واماتـهـا
يلتفت لين انقطع دونهـا شوفـه الأخيـر=اتحثـا فـي وجههـا الرمـل بيدياتـهـا
ويا وجودي وجد شالح على اخوه الصغير=عقب ما ضمت لحـود القبـور امواتهـا
منس له فالحشـا فرجـة مثـل النذيـر=كن الايام كشفـت لـه طـرف غراتهـا
ووجد من نكد على امه ضحا العيد الكبير=غضب واغضبهـا ولا وفـق لمرضاتهـا
ان تعذر دنقت وشهقـت مثـل الغريـر=ون تركها يفطـر الكبـد طـول سكاتهـا
ووجد من بشر ورز العزا عقب البشيـر=جا الولد وامـه سهـوم المنيـة جاتهـا
وشافها كن القمر فـي نحرهـا مستديـر=بنتهـا الوسطـى تلـوى علـى عماتهـا
وعقبها راحت حياتـه عبـوس قمطريـر=باهتـه حتـى فرحهـا مثـل ماساتـهـا
مرتين تطلـب الـزود فاليـوم القصيـر=ينثنـي فاتـلـى مداهـيـل ذكرياتـهـا
ان تهجا اللبس يالله عسى مقسـوم خيـر=ون نظر فـي منظرتهـا ذكـر نظراتهـا
اتوجـد ويتوجـد معـي حـي الضميـر=لا تمعن حـال الامـة وشـاف سواتهـا
ما يحقق حلم ليل علـى جنحـان طيـر=الا الله موجـد الـروح عـالـم ذاتـهـا
وسلامتكم جميعاً ،،، وتقبلوا خالص تحياتي،،،