افكر في لمى.....

[معلومات العضو سلمان بن فارس بن قويد]

من البارح الين اليوم وانا ماغمضت لي عين =افكر في لمى وارجي من المولى سلامتها
انا ادري كل شي مكتوب للمخلوق زين وشين =وانا ادري كل نفس ماتموت الا ساعتها
ولكن يابعد عمري ابكتب للحزن سطرين=ابنثر دمعة عيوني تبين لك معزتها
لمى يانور عين اختك وياقلب شقاه البين=ياطفله طاهره كل المعاني في براءتها
يهددها المرض بالموت تضحك تنتظر بعدين=تجهز للدراسه تنتظر موعد بدايتها
تقول احب ابلاتي واحب من المواد الدين=تكلمنا وتسالنا على ساره صديقتها
تسولف عن مواهبها وحب الرسم وتلوين=اشوف الحزن يقهره الامل تعبير رسمتها
الا يارب يارحمن حنا بالقضا راضين =ولكن يالطيف الطف بحالتنا وحالتها
وانا من ليلة البارحه سهيره ماغفت لي عين=افكر في لمى وارجي من المولى سلامتها

نسأل المولي ان يلبسها ثياب الصحة والعافية
وتقبلو تحياتي