ََّّّّ~ ّ~ّّّّّّّّّّّّّ كلمه مني وقصيده منك ّ~ّ~

[معلومات العضو لين]

كم حلمت اني أصير انسان مستثمر وكاش = وشفت طفرة سوق الاسهم.. قلت: فرصه واسنحت
ويعني ياخي لي متى وانا آتحرّى هالمعاش = خلّ اخشّ السوق .. غيري ناس خشّــت واربحت
خذت قرض وقمت اضارب في القيادي والخشاش = وجا على وجهي انهيار السوق .. ويدحدر تحت
قلت: يمكن فترة التصحيح .. وتاليها انتعاش = وطالت المدّه علينا .. والدراهـــم روّحت
ليتني أقدر أبيع وبعت لو حتــى ابّــلاش = البلا انّـي ما قدرت وليت الاسهـــم صححت
كل يوم امرّ اشوف المحفظه حمرا .. وماش = يبدو ان الوضع مـُــزري والأمــاني إنمحت
مابي الا راس مالي وتوبه ماعــدْني بخاش = واضح ان السوق لعبه .. والهوامير افلحت
معظم الشعب السعودي طاح .. والهيئه طناش = جت على روس الصغار .. وفلّستهم .. واذبحت
ما كأن الوضع إلا حلقه من حلقــات طاش = واسم "نكبة مارس" اللي طاف .. مأساوي بحت
إبتلشنا واشهد انّــه كان شرّ الإبتـــلاش = لا القوانين انصفتنا .. ولا الأمور ْتوضّــحت
مالنا ياكود ربّــي ثم "ابو متعب" وعاش = المليك اللي على يدْه المــوازين ارجحت
ننتظر فرض القرارات السليمه .. والنقاش = صلّـح فبعض الأمور .. وبعضها ما تصلّحت
هذا انا لي حول شهرين ومعاي الوضع ماش = وصحّـتي مثل "المؤشّر" قفــّـلت نسبه تحت

المفالي