(( نخبه من محاورات شعـراء الموقع )) من غير ردود

[معلومات العضو بدر بن صقر العجالين]

بسم الله الرحمن الرحيم

السلام عليكم ورحمة الله وبركاته

يسعدني ويشرفني ان انقل لكم هذه المحاوره اللي صارت بيني وبين ( الشاعر / بعيد الهقاوي ) وتمت هذه المحاوره في منتدى قبيلة الدواسر الرسمي بتاريخ 13 / 6 / 2008 م وابتدت الساعه 7:32 مساءا ..

وابتدى شـــاعركم بدر بن صقر العجالين وقــال :

هاض الضمير و زان بدع الطواريق=يا مرحبـا بـك يابعيـد الهقـاوي
يامرحبا من وسط قلـب ومعاليـق=بالشاعر اللـي للجزيـلات نـاوي

و رد الشاعر بعيد الهقاوي وقال :

دام البقاء لك والمواقف توافيق=والله يجنبنا طريـق الدنـاوي
ترى السوالف ماتبي زود تدقيق=عطنا علومك بعد ما جيت عـاوي

و رد شـاعركم بدر بن صقر العجالين وقـال :

مابيننا طبعاً عهـود ومواثيـق=سلم القبيله والربـع والعـزاوي
بعض السوالف لازم اليوم تحقيق=والا كذا تصبح كثيـر البـلاوي

ورد الشاعر بعيد الهقاوي وقـال :

فصل عليها الثوب بالقوس وتليق=ونسميك من عقب المجاعه غناوي
ترى السوالف كل ابوهـا تلافيـق=ومنهو تلوى جعـل يلويـه لاوي

و رد شـاعـركم بدر بن صقر العجالين وقـال :

فصلت لي ثوب(ن) مفصل بتطبيق=والصيد من رزقة جزيل العطاوي
كم واحدن قد زاد حرقه بتحريـق=وامسى طوال الليل كله شقـاوي

و رد الشاعر بعيد الهقاوي وقـال :

يرزقك والي الخير رب المخاليق=من بعد منت تبيع تمرً حساوي
برش فوقك موية الحق وتفيـق=من بعد ما عجز الطبيب المداوي

و رد شـاعـركم بدر بن صقر العجالين و قـال :

نبغى نوسع مانبي سكة الضيق=بركبك في وسط وارد عـراوي
والكي ينفع في امور المطافيق=تلزمك كيّه بين ضلع وكـلاوي

و رد الشاعر بعيد الهقاوي وقــال :

اللي سرى يبغى محاضر وتحقيق=كنه على سود المناهيـج نـاوي
سقنا قدمنا والضعن قبلنا سيـق=لكن لقينـا الـدار دارً سنـاوي

و رد شـاعـركم بدر بن صقر العجالين وقـال :

اللي يشب النار يبشر بتطويق=وانا على النيران حر(ن) نداوي
الدار للي من هل العرف وتليق=للي على درب الرياجيل غاوي

و رد الشاعر بعيد الهقاوي وقـال :

قدم الحبارى تسع ميـة تفافيـق=والكل منهم للمعاريـف حـاوي
حتى لو انك جيت في قمة طويق=مثل العور لا من سبق له عماوي

ورد شاعركم بدر بن صقر العجالين وختمها وقــال :

عندي لذا البندق فشقهـا صناديـق=مير ان اجنب صيد ذيك الصعـاوي
من روعة الرامي غدى اليوم تصفيق=واللي على النبله قصير الخطـاوي

أتمنى أن تكون المحاوره أعجبتكم وأتمنى أن أكون عند حسن الظن..

مع تحيات أخوكم
( بدر بن صقر العجالين )