حسن بن بطحيه

[معلومات العضو شافي القويسي المخاريم]

يا موزع النعم

النعم ياموزع النعم ماهي بالكلام= النعم له راعي وصاحب يستاهله
النعم ماهو كلام يوزع والسلام= كلمه مستهلكه طالعه يانازله
والنعم ياموزعه ماتقدم للخمام= البخيل الخايب اللي علومه خامله
والنعم لاقلتها للردي ظلم وحرام= الثعل راعي نوايا الردى لاتجامله
النعم معناه غالي وله شرط ونظام= مايحوزه طافي الظو ولا ينساقله
النعم تعطى لراع الكرم ابن الكرام= مجلسه عامر ومعروف كل داهله
الدلال الدور والعود يقدم للحشام= والعشا دايم يصوت لمن هو يأكله
والنعم للي ليا صار في الصف انقسام= مايطاوع في ربوعه عذول عاذله
امحبوب من جماعته يحظى بحترام= نفعته لصغيرهم قبل الاكبر شامله
والنعم للي ليا تاهت الاريا وقام= حلها حلال عقد الحلول الشاكله
رايه يقدي كما الجدي في عتم الظلام= يرشد الساري ويبلغ مناه وياصله
والنعم للي على عز نفسه مايسام= عايش عف عزيز حياته كامله
عن صغيرات الدنايا رفع نفسه وشام= كل عاقه جنبه وتركه ومجادله
والنعم للي ليا ثارت الهيجا وحام= في السما طير الفنا ساق روحه عاجله
في القدا عند القاء كنه السيف الحسام= صيرميا يرعب القوم وقع مقاتله
والنعم للي عهوده يوفيها قوام= لاوعد يوفي كلامه بدون اماطله
الوعد للحر كالدين يلزمه التزام= والوفا يحسب حساب الخصال الفاظله
وسبعه انعام لمن هو جمع ذي بالتمام= كايد نادر تحصل مثيل أيعادله
النعم يفخر وياخذ من اعلومه وسام= لايق بالنعم والنعم فعلا جازله
سمعته ذعذع نباها كما ريح الخزام= سيرها في الارض سير الهبوب الباتله
كالحيا لاحل قامت تباشربه الانام= والحياء يحيي جذور النبات الهازله
عادته بالطيب كالغيث هتان دوام= مادرت يسراه ويش بيمينه باذله
ذا لامنك قلت له نعم مالحقك ملام= المراجل باخره والنعم هو ساحله
البلا لا قلتها وانت لك قصد ومرام= مثل من خلا صلاته وجاب النافله
ياصلاة الله على محمد المرسل أمام= عد زخات المطر يوم سكب وابله