يا الله يا اللي كل مضطر يرجيه ( نادر الناهشي)

[معلومات العضو الزين]

وش عذر بقعا والعرب والمشاريه=وش عذرها من يوم جينا عليها
من اولٍّ في جنة الخلد والتيه=وذنوبنا من طيشنا نشتريها
من يتبع الرحمن بالصدق ينجيه=يكفيه صكات البلا ما يجيها
ومن يتبع الشيطان بالشر يغويه=أحلام ليلٍ والخزي مقتفيها
من باع دينه فالمذلة تخاويه=يمشي بها فقيرها مع غنيها
ومن لا يصلّي ما توفّق دعاويه=ومن لا حسب مدخولها راح فيها
ما كل غرسٍ مثمرٍ من سوانيه=وما كل من وصل السما يعتليها
ومن يجهل القرآن وقته يوعيه=صولات عرجات الزمن يبتديها
يا الله يا اللي كل مضطر يرجيه=يا مبغضٍ ناسٍ وناسٍ يبيها
يا واحدٍ ما ضيّع الجهد محصيه=وما شاركه في الكون من يدّعيها
تفرج لمن بيته على العز بانيه=لو غار حسّاد الرجال ودنيها
يا هيه يا اللي تنقل الكبر يا هيه=يا راعي الدنيا حريصٍ عليها
نجمي علا نجمك ولو فيه ما فيه=وما لك على مثلي دروبٍ تبيها
أنا كحل عينك وتاجك وباقيه=يا شبه من تسكن وتكنس حويها
ما انت بنطيحٍ لي بفعلي واعاديه=يومك على قدّك عليها عليها
كانك على ذمّ المناعير هاويه=فانا عمى عينك وانا مبتليها
ما يستوي راس الجسد مع مواطيه=وما كل من رام العلا من بنيها
تبت يدا الانذال حاسد وواشيه=تبت يدا الدنيا وتبّت يديها
يقوله اللي ما رجى كون واليه=بيّنتها واعلنتها واعنيها

بيض الله وجهك على النقل الطيب وصــــــــــح لســ شاعرهـــــا ــــان قصيدهـ أكثر من رائعه