عيديتين

[معلومات العضو عاشق سراب]

المشاركة الأصلية كتبت بواسطة حزين الحرف

اخواني الأعضاء كل عام وانتم بخير
وعيدكم مبارك
احببت أن اشارككم بقصيدتين في مناسبة واحد ة
وهي العيد ولكن يختلفان في الظروف بينهما عام فقط
وبينهما الف عام من الحزن والتغيير
لكما القصيدتين

القصيدة الأولى

العيد ماهوب عيد الفطر وضحية = العيد عندي معايد من على بالي
العيد ماهو شرى ثوبِ وطاقية = ولاهوبكشخة ورزة شمغ وعقالي
العيد والله إلامن أتصل بيّه = ثم قال عيدك مبارك يا بعد حالي
من عقبها ما أعرف وشهو حصل فيّه = مدري ألاحي خفوقي ولا جوالي
خفوقي آحس فيه ألعاب نارية = ومن زود نبضة أحس إن فيه زلزالي
وجوالي اللي قبل قد أهدته ليّه =الله يخلف عليّه صابه خبالي
من حلو صوت الحبيّب ذاب فيديّة= ماعادبه فود في استقبال وإرسالي
من نغمته قلت يا مرحب وياحيه = من يوم رنّت "هلا بالطيب الغالي "
لأني مخصص لها نغمة فقط هيّه =وعند الجماعة وكني جالس لحالي
غديت أهوجس وأقول أبيات شعرية= وأبداع من جزال شعري بيوتِ جزالي
من صوتها اللي جمع رقة وحنيّة = شوفوا وش اللي حصل لي وويش يجرالي
وش لون أجل لأجتمع مع صوتها جيّه = عز الله اللي قضيت وجاني هبالي

القصيدة الثانية

أول تكلمني من العيد للعيد = واليوم راح العيد ماجا أتصالك
في كل عيد تقوللي عيدك اسعيد = والعيد هذا ماطرينا فبالك
ياخي ولو ترسل إذا مابه ارصيد = "كل عام وانت بخير وشلون حالك "
مدري وش اللي صار ياشيخة الغيد = وش يمنعك ما تتصل ؟وش جرالك؟
أولا معودني على الوصل تعويد = ومايكتمل عيدي بليا وصالك
واليوم كثرت الهجر والتصاديد = وقفيت عن خلِ بحبه وفالك
وين الحلف ؟ وين العهد ؟ والمواعيد = ماقد حلفت وقلت : إني حلالك
وش فيك خنت العهد من بعد توكيد ؟ = وبعت الخفوق اللي يحبك لحالك
المشكلة إنك تزوجتي بعيد = لاهو ولد عمك ولا ولد خالك
وأكبر بلا لاشفتكم إيدِ بإيد = عز الله اللي قالوا فلان هالك
كنت أحسب أيامي لجل عيدِ اجديد = فيه استمع صوتك ونبرة دلالك
ومن عقب ماجبتي بخفاقي العيد = ماعاد ابي عيدي ولا أبغى أتصالك

وسلامتكم
اخوكم
حزين الحرف
عبد الرحمن سعد

====================================

	اخوى حزين الحرف عبد الرحمن سعد السلام عليكم ورحمة الله وبركاته سلمت أناملك وهذي حال الدنيا وزي ماقال الشاعر: الوكاد ان المحبه ماتدوم!! وكل جمعى مابعدها ألأ الفراق!! وأسأل مجرب!! لك صادق الود