|
|||||||
|
|
19-11-2008, 08:54 PM
|
#1 | ||||
|
رد: خالد مدعث الخرفاني
( صوت )
يا طير يا طير يا طير السعد ياللـي تـرف الجنـاح = لا واهنيـك ليـا ضاقـت عليـك الارض خليتـهـا وان رحت وان جيت ياطير السعد تسبق هبوب الرياح = واظن ما فيه ديره فـوق وجـه الارض مـا جيتهـا مانته بمثلي تجي وتروح ما يصعب عليـك المـراح = لكـن ياليـت جنحانـك معـي يـا طيـر ياليتـهـا كله على شان ازور اللي رمانـي بالعنـا واستـراح = اللـي علـى شانـه الاقـدام عنتـنـي وعنيتـهـا في ماضي الايام اشوفه قدم عيني في المسا والصباح = واليوم حتى العلوم اللي تجينـي عنـه مـا اوحيتهـا وليا نشدت العرب ماحـد يعلمنـي عنـه ويـن راح = واتعبـت نفسـي وبالنشـده كثيـر النـاس بذيتهـا لا ووجودي علـى شوفتـك مـره ياظبـي البـراح = ياللي على شانـك العبـره علـى الخديـن هليتهـا يابو عيون هدبهـا يـزرق العشـاق زرق الرمـاح= ذبحت روحي على كفـك برمـش العيـن واحييتهـا حبيب العازمي ( صدى )
يا طير يا طير يا طير السعد ياللي تسمى فلاح = يا حلو جنحانك اللي فوق متن الجوّ فليتها ان تاق صدرك تصف الريش يا طير وتشوف الفياح = و أنا على الأرض ، تاق الصدر لكن ما تعديتها يا طير ما تأخذ اعلومي لـ خلّي كود تبرى الجراح = و تكسب علشاني الاجر العظيم ان كان وديتها قل له ترى البعد عنّه حط فوق الكبد ، سمً ذحاح = و قل له تراني علشانه نجوم الليل عديتها من اولً فالهوى ماغير انا ويـّـاه ضحك و مزاح = واليوم من دونه سباع القرى يا طول تصويتها واليا اذكروه العباد ، اسمع لـ قلبي في ضلوعي صياح = ثم جبت ونـّـه ، على ونـّـه ، على ونـّـه .. و جريتها ما ردني دونه الا الحظ .. حظي كل ما قام طاح = وش فيك يا حظ لا جتني علوم الخير لديتها و أكتم على قصتي يا طير بين الناس .. حذرا تباح = قصة غرامي ترى ماغير لك يا طير قصيتها خالد مدعث صوتيه
|
||||
|
|
|
24-11-2008, 07:19 PM
|
#2 | ||||
|
رد: خالد مدعث الخرفاني
من روائعه الشعريه
البرق لعيون المولّع مناديب=والبيد لقدام الخلاوي ركايب
وارواحنا لهموم بقعا معازيب = ومعزب الارواح قبر ونصايب سبحان من يخفي عن العالم الغيب = وخلى الوعد مع نازع الروح غايب كلن يسوق الرجل ويروح ويجيب = احدً يجيب بسلم واحد نهايب احدً يجيب الفود والعز والطيب = واحدً يذله كل ماكان جايب ومن لاستر وجهه عن الذل والعيب =ماعاد يلقى لذل وجه طبايب ومن لاحمى وجهه قبل طلعت الشيب = محدً يعوضه وجه لاصار شايب ولصار ذكرك فوق روس المراقيب= خلك على دربك ترى الدرب صايب تصير فعيون النشامى كما الذيب = وفعيون عدوانك عطيب الضرايب موت الفتى بالمرهفات المحاديب = اخير من حيً مع الناس خايب موتن تباكى له عيون الاجانيب = ولا عيشتن تدعي عليها القرايب ولّي نفوسً ماتروم المواجيب = ولّي يدينً ماتسد النوايب عذر الردي ماكل من يجهد مصيب = عود الحماطه كاسرتها الهبايب مايخلف الهقوه طوال الاشانيب = صحيح من قال المراجل وهايب يربى على الشاهوق عكف المخاليب = والا الوطى يرباه بوم الخرايب من راقب العالم يشوف التعاجيب = ومن طاول الدنيا يشوف الغرايب غير النبي محدن بليا عذاريب= وكلن على الثاني سيوله جذايب ماكامل الا وجهه جزل التواهيب = ولا راحب الا اللى من الذنب تايب كلً اذنوبه تغرق الكم والجيب = وكلن عليه من الليالي مصايب ليه الحسد والغل والشك والريب = وليه القطيعه واندلاع الحرايب يولد الاحقاد شذب العراقيب =والحقد سمً فالمعاليق ذايب شرارتن من ملحقين المشاهيب= من ناشته خلت اضلوعه حطايب يومون بالامواس مثل القصاصيب = ذنبً يوقف منه قطر السحايب لعل من يفرح بشيل المشاعيب =ويصير في فرقى الرفاقه سبايب تقطع عراويه من الرزق والصيب =ويموت ماتنظر اعيونه حبايب وتصفى النفوس ويركدّن المشاريب = لابه ذنب عقرب ولابه نشايب هذا بعض ماعلمتنا التجاريب = اللى من الايام جتني جلايب لاكامل الا وجهه من يعلم الغيب = ولارابح الا اللى عن الذنب تايب
|
||||
|
|
|
25-11-2008, 09:24 PM
|
#3 | ||||
|
رد: خالد مدعث الخرفاني
( ماكل بيضا بشحمه )
و قلبي اللي من زمانً فات ماخوذ سبي = سبي الحناشل من مراح راعي ابله وغنمه
الليل يسري بالدبش والذيب والحايف يبي = والبدو ماينهب دبشها الا الليال المظلمه الحايف ايحوف الضعن والذيب لضان يحبي = والراعي المسكين عن غيب القدر من علمه امسى غني يلبس العمه وتزهاه العبي = واصبح فقيراٍ مايحصل لقمة تملا فمه واللي جراله قد جرالي ياحمد وانا صبي = قلبي من الاضلاع منهوب بدمه ولحمه اتلا العهد بالقلب يوم انا مابين امي وابي = اثره على الحب انفطم قدام لاامه تفطمه محدن بكى ولاشكى سواة ناري وحطبي = ولابه مثل ساقي تعنا واتعبه سير اقدمه بصبر واكابر دامني بالحب غبرت اشنبي = قال المثل من لايغبر شاربه ما دسمه بس اتحرى وارتجي يخلف لي الله اتعبي = واقول عذري فالهوى ماكل بيضا بشحمه القلب مدهال الهوى واصعب هوى حب اجنبي = وطبع العرب كلٍ يعيي دون مرباه ودمه وانا على ليت و لعل ، احط وانقل مزهبي = ومن فوق عش العنكبوت ابني الرجا ثم اهدمه طال المدى وانا اتقلب بين ناري واحطبي = اموت واحيا والغضي يكوي الضلوع بميسمه لولاك ياعذب اللما عين الوحش عنق الضبي = ماكان تامرني وتنهاني بضحك وسلهمه لولاك الهوى ماكان تملك راس حرً يعربي = خلاك خوان الرجال بدون حربا تحكمه الله يبيحك واستبح عمري ودمي وذهبي = حللت لك كل الثلاث اللي علي محرمه دوجي بريضان الحشا واكلي ربيعي واشربي = الله عطاك من الحشا بيره وتمره وعجمه وسويت بي مالا رضاه الله ولادين النبي = ملكتني ملكة نصارى والديانه مسلمه واليوم ياعذب اللما عين الوحش عنق الضبي = حقً عليك اليا خضع لك صاحبك لاتظلمه
|
||||
|
|
|
29-11-2008, 10:35 PM
|
#4 | ||||
|
رد: خالد مدعث الخرفاني
قلت هلا مرحبا بالنار والملح والبارود = هلا بالسيوف وحربت الشيخ وجنوده ياشيخ العرب قلّط وانا الجود والماجود =محلك بصدر المجلس اللى نشى عوده محلك على خبرك على عهدك المعهود=محرّم توقع غبر الايام بحدوده حمته الضلوع بحشمة اربع سنين وزود= حشمته زمان اللى علي تقدح ازنوده اليا طالت الفرقى سببها الليالي اسود = الا ياقسو قلبً بيلحقك منقوده لك الله لادوّر عذر والقلوب اشهود = دخيلك ترى دمعتك مهيب محدوده على طاري الفرقى ماشوف الحروف ارقود= يجي ليلها ليل ابدوي ضايعً ذوده وبرسل قوافل شوق لك مع خفيف النود = والا يالله الخيره اليا جات مضهوده
|
||||
|
|
|
29-11-2008, 11:20 PM
|
#5 | ||||
|
رد: خالد مدعث الخرفاني
 تفيض دموع عيني كل ماخيّلت لي براق = سوات الجالي اللى لاح برّاقً على اوطانه صحيح ان البروق اللى تلوح تهيض العشاق = تذكر من تولّع بالهوى ربعه وخلانه اخيله مير انا يابو خلف كني كسير الساق = بعيد الدار , ذيب الضلع دونه كسر الحانه الا يافيصل المنعور الا يافزعة المشتاق = انا روحي على جمعى حبيب الروح شفقانه ثلاث اسنين اكايد عبرتي وانا على الميثاق = هو صابر على شاني وانا صابر على شانه نبي نصبر لو ان الصبر صبرً مر ماينذاق =نهين النفس عند الناس مير الناس منانه تجمعنا على سلم الهوى وذي سنه الخلاق= على وضح النقا ماقط لمس لساني السانه انا مالي جدى الا كتبت الاشعار فالاوراق= واجر الصوت تال الليل يادانه على دانه
|
||||
|
|
|
01-12-2008, 02:19 AM
|
#6 | ||||
|
رد: خالد مدعث الخرفاني
إقراء بهدؤ طلبتك يا إلاهي وانت مجري الريح بالهمّال = طلبتك مزنةً من تحت عين العرش همّاله اغثنا مع هبوب الغيث غيثً صيّبً وبّال = مشى وانشى بربانً غشى البيداء تعزّا له مزون ٍ من كثر ماها غدن اثقال فوق اثقال = تدّّلى كن كف الأرض يجتّره ويرقى له قراح ٍ من مزابير تزبـّر كنهن اجبال = دفعه الغرب والشرقي يهب ويردع اجفاله سحاب ٍ في مقاديمه نصوب ٍ كنهن اشيال = تزاحم كنها جيوش الزناتي يوم تبرا له تضاحك في مقاديمه بروق ٍ يشعلن اشعال = ثمان ٍ في ثغر غرو ٍ تلألأ من ورا شاله ومواخير ٍ تهل ادموعها عذب ٍ قراح ازلال = شخاتير ٍ مثل ضرب المشوّك صوت وبـّاله إليا من زل ّ عقب سهيل خمسين وثلاث ليال = طلع نجم السويبع وأعلن الوسمي ومدخاله طلع نجم ٍ يبشر بالحيا بدو ٍ لهم ترحال = جذبهم بارق ٍ ليله سرى في عارض اخياله بداوين ٍ على الخبت المربـّع حطـّو المنزال = مصاليـح ٍ تبوج البيد شاويـّه و وبـّاله عسى جرد الفيافي من عقب طول الدهور تسال = يزينها كريم المد ّ من حاله .. الى حاله يزف ّ الروض زملوق ٍ نواويره بكل أشكال = تمايل مثل سنبوك ٍ يطق ّ الموج في جاله غصون ٍ تنثني لا نسنس الغربي يمين شمال = تثني خفرة ٍ غنى لها عشرين طبـّاله تلوّى فوق بعض ٍ مثل ديبان ٍ بعود آثال = وتحت ظل ّ الغصون يحصّل العصفور مقياله فياض ٍ من زهرها الطير يركع له ركوع اذلال = جمال ٍ من بعد شوفه نسى اللجّه وتجواله زهور الروض خلّت لـــ أم سالم فالعَصيَر اهبال = تجرّ الصوت بالمنكوس ( يالآله .. ويالآله ) تخاتيـخ ٍ خلاها للحباري والضبا مدهال = مرابيعه هل الذيدان ماتقدر تعنـّا له يرودونه قوانيص ٍ خذو مع سجته تجوال = وعلى طرد الولع مايقبلون هروج عذّاله تسـّلو فالحياة وخلوّ الدنيا وجمع المال = مادام الموت في طلق الرقاب ملوّي احباله غرامي .. نقلت القرناس ، ومرافق زحول رجال = مناعير ٍ تسد ّ النايبات وتحمي القاله معاهم لذّة الدنيا مزوح ، ودله ، وفنجال = على نار ٍ عليل الروح منها ينشرح باله وعلى كفي عديم ٍ مخلبه مايرحم الحفـّـال = عطيب ٍ مثل حد ّ مصقل ٍ بـأيدين قتـّـاله تلافوبه صقاقيرً وراه يدورن ريال = وحش فرخ ً مواكيره هضاب ايران واجباله نحره ابيض وراسه كاشف وصافي وريشه خال = معرّى جسمه وزيّن وصوفه باقي افعاله عريض الصدر مفهوق ٍ جناحه والعظام اجلال = وطول وعرض والنادر من النارد تسلساله قصير كراعه وساقه عليه مضفره سروال = احلي به على اردون الملوك بطول سرواله طويل العنق واعيونه عليها تضرب الأمثال = يوصف به راعبيب ٍ على الأرواح نشّاله اليا منه رفع راسه على طلع ٍ بعيد امحال = مثل داب ٍ تعلاّ فوقه الصيد .. وتعلوى له يوكد لو طلع بـأرض ٍ تطارد به سراب اللال = ولا قد تل ّ مسباقه على شي ٍ يورّى له يشادي فالركاده .. عابد ٍ خاشع لـ آذن ابلال = والى من زاع .. كنّ الارض من تحته تطوّى له والى حوّل .. مثل نجم ٍ من علو ّ السما منهال = والى منه ضرب بالكفّ .. فال الله ولا فاله نهب قلبي غلاه وصار حبّه فالضلوع لحال = غدى له فالحشا وكر وعروق فوادي احباله ذراعي من تحته وكل فال ٍ يقتفيه اعقال = حشمته لين طال اللي كثير الناس ما طاله ليال ِ النقل و اهدود الوحش منوة عليل البال = غرام اللي شقى الدنيا وطول القيظ غرباله وابسوق القدم في مهمه ٍ خال ٍ من الأنذال = بعيد من بعض ناس ٍ وجوده فالزمن عاله مع ارجال سوالفهم مهيب اهروج قيل وقال = طحاطيـح ٍ ثقيل الحمل تبرك له وتشتاله واسلي من صواديف الليالي قلبي الشغال = واقول : اعوذ بأسم لله من شيطان واعياله
|
||||
|
|
|
01-12-2008, 07:03 PM
|
#7 | ||||
|
رد: خالد مدعث الخرفاني
مساجلات الشاعر ( صوت )
هيه يا قلب المحبة ما بقى في العين عبره=كل يوم والعيون من الغرام يسيل ماها لين صار الجفن عنده من غزير الدمع خبره=وانت شيخ حنوة الاضلاع مسجون وراها ما تعدى لو طلع راس الجمل مع سم الابره =في ضلوعي بكيتك ما غيري بيسمع بكاها يا سجين الجوف تدري مالنا في الحب قدره=سنة للناس مدري وش قداها من خطاها الهوى كانه خطيّة ما حدٍ قد جاب عذره= والهوى كانه مباحي علّة صعب دواها اصبر ويلقى طويل الصبر في الايام صبره = كم صبور جاب صبره حاجة عسر لقاها يا فؤادي صرت لك حزمة هشيم وانت جمره= كل ما هب الهوى بأطرافها يكبر سناها والهوى تاليه فرقا والنوى لو طال عمره= ما نسينا العهد وجروحه براها او ما براها دام عهده في يميني والنجوم اتجيب خبره =نعتبرها غايبة عنا وحجّتها معاها لو درت وش صار فينا ما خذت عن نجد سفره=يا هبايب علميها كم شقيّ في رجاها منبت النوّار عقبه يذبح العسّاس دهره= حالف ما عاد ينبت في ديار ما وطاها المولّع عقبها ينقل على الكفين قبره= ميّس ما عاد تشتاله عظامه من جفاها عقبها راع المطايا ما دعى للعد نشره= والظوامي صافي الميراد ما يقطع ظماها جادل حده زمانه عن روابي نجد مكره = والليالي ما تخلي مستريح في ذراها صوب دار مالها من قسمة الاجواد بذره= النجايب سبعة اشهر ما يجن ارض نصاها البحور تحول دونه والفجوج الجرد عسره= والذيابة تحتري مع سكة الطرقي عشاها فرّق الله شمل من فرق ثنين كان خشره= في غرام وفي علوم يشهد الوالي علاها ما يحق الواحد مالقح النخلة بتمره=من سقاها واحتماها لأثمرت يقطف جناها كنت اقول يموت رجل ما نفع نفسه بعمره = ثم قلت يموت رجل حدّ نفسه منتهاها كني الرحال وسنين الليالي الشهب بكره=شلت زادي في خباها والحيايا في خباها يا عنود الصيد لو آخذ من الايام عبره=كان روحي في يمينك حكم ربي ما رماها جيت لك غيث تهادى وانت يمي جيت حسره=يوم علّقت السحابة سقت رجلك من سماها لك شهر من غبت عنا والهوى يا طول شهره= ذكريها يالثريا وانشديها وش بلاها العرب قد قالوا انه مع توالي العج مطره=واعذابي كانها عجت والاخرى في قفاها والهوى لا زان قاده للولايف سلك مكره=مير وحي من عرفته والهوى يلعن ثواها اتصبّر واتحرى رجعة الغيّاب بكره=والزمان بعيد والايام من يلحق مداها يا نديبي هاك خط من دموع العين حبره=الرسالة غير (ناصر) لا حدً يبحث خفاها صاحبً بين النشامى بالمراجل بان ذكره =السبيعي لا تعزوى عزوة العود احتماها يا ابن فارس شف صحيبك عيّب الجبّار كسره=ان بكى قال اقطعوها وان شكى منها كواها يا ابن فارس كان عندك في عميق الجرح دبره=لا تخلي صاحبك ينقل جروح ما قواها حالتي حالة فقير يوم قام يسدّ فقره=ما لقى له غير عين تدفق من الفقر ماها خالد مدعث الدوسري
|
||||
|
|
|
21-06-2010, 02:55 PM
|
#8 | ||||
|
رد: خالد مدعث الخرفاني
انا مايوسع خاطري مثل هد الطير = ليا لاحت بروق الوسم وانتثر ماها
غرامي ليا قام النداوي يتل السير = على خارم مايطلب السبق لولاها عريض الثنادي والكراع افجحً وقصير= طويل الموامي يطوي الارض لاومها اطياره يخلي المقفيه ماتعرف اطير = كفخ من تحتها ومن علو السما جاها يجيها من علو السما منتكس ومغير = وتدلى عليها الصوايد ودلاّها هذي عشقتي واهل الولع ماتطيع مشير=وانا ماخبرت احدً عشقها وخلها هذي رغبتي واللي يخلي النفوس بخير = امرافق رياجيلً على العز مبداها وسوق القدم في فيضةً مالها تصوير= سقى نبتها من رايح الوسم مولاها فياضً بها النوار منها العيون تحير = صعيبً على ادباش البداوين ترعاها نسمها مع النسناس طيبً يفوح اعصير = روايح عروسً فايح الطيب بخباها خليً خلاها ماوطّنه بنات بعير= مصيف الحباري والجوازي ومشتاها مقر القنوص مصخرين الصعب تصخير= فجوجً ضعيف النفس ماهوب واياها يهاب الخطر مايدري ان العمر تعبير = والايام تلوي طلق الارقاب برشاها يسب القناصه راعي النوم والتصفير= يبي لذة الايام والنفس واخطاها يحسب الخساير فالولع والخساير غير = نفوسً تخسر الدين منشان دنياها وانا لو جبال اطويق تنزل بجنب النير = فلا والله اترك نقلت الطير واجفاها
|
||||
|
|
|
06-12-2008, 10:39 PM
|
#9 | ||||
|
رد: خالد مدعث الخرفاني
طلبت الله قبـل مبـدأ القصيـده غافـر الزلـه = رفيع العـرش عـلام الغيـوب أمدبـر الأفـلاك
ألا يالله يامطـلـوب ثبتـنـي عـلـى المـلـه = بقولة لا الـه الا أنـت ربـي مامعـاك أشـراك انا امنـت بـك واللـي بديـن الحـق مرسلـه = انا عبدك وابن عبدك وادور طاعتـك ورضـاك ابي ضلـك بيـوم فيـه غيـرك مانبـي ضلـه = بيـوم الحشـر يـارب العبـاد أبلتجـي بحمـاك وأنـا ماقـول هـذا كـبـر لله والكـبـر لـ الله = تعودنا نعز النفـس عـن ذولـى وعـن ذولاك تعودنـا علـى بيـت الشعـر والنـار والـدلـه = وتعودنـا نقـول أهـلا هـلا ياضيفنـا حيـاك وتعودنا على الجيره نصون الجار عـزا له = وعلى الخوه خوي الجنب ماياطى على الاشـواك وتعودنـا وتربينـا علـى سلـم العـرب كـلـه = على العفه على الشيمه على الحشمه على الادراك مواريـث الجـدود اللـي تـورد للعـدا عـلـه = الا ياسلمنـا ياسلـم جدانـي حـلـو مـحـلاك الا ياسلمنـا ماجـاك مـن شيـن الدهـر خلـه = الا ياسلمنـا ياعزنـا لا عـاش مـن خــلاك
|
||||
|
|
|
06-12-2008, 10:51 PM
|
#10 | ||||
|
رد: خالد مدعث الخرفاني
 أنا ولد مدعث على الطيّبه طبت= ما الّد عينـي فـي بنـات الرفاقـه من طيب ابوي وطيب عمي تعربت =ومن طيب خالـي مالحقنـي لحاقـه
|
||||
|
|
|
17-12-2008, 12:42 PM
|
#11 | ||||
|
رد: خالد مدعث الخرفاني
اهل الولع تشفق على طلعت اسهيل = وتضيق خطّرهم من الصيف وتمل واليوم قد لسهيل خمسة عشر ليل = واقفى لهيب القيض ووقت الهدد حل والطير جاهز مايبي غير تدهيل =الريش صف وصك موسه وكمل واليوم ياخطل اليدين الحلاحيل = ياجامعين الدين والطيب والدل يامدلهين اللى بقلبه غرابيل = ياللى بكم عقد الحجاجين ينفل قطاعه الفرجه بليا دواليل = واليا سروا مسرى السراحين تندل نبي على اللى تبعد الدار بالحيل = فوق الجيوب اللى تتل الوطى تل صنع الفرنجي عابد النار والفيل =اللى بلا دستور حرّم وحلّل نبي عليهن نضرب البيد ونزيل = همً علينا كبر ابانات واثقل ثنتين تشفي الهم , خوت رياجيل = وشوف الفياض اللى زهرها كما الزل مرسلها الرحمن غرً هماليل =بأمر الكريم انشى من الغرب واقبل وقام يتقحم مقدمه كنه الليل =والبرق يبرق والرباب يتعزل والشرق تضرب في اخشوم المخاييل =متركدً ممشاه ويحن ويهل من مبتدى الوسمي وسيلً بأثر سيل = خمسين ليل يروّح المزن ويعل وتجملت الارض من نبتها تجميل = تشبه عروسً طيبها الكاد والفل متشكلً تلعبه النود ويميل =عشبً لقى غير الدفى والمطر طل والبدو مايطري لهم بالمحاويل = كلن بداره شبعت الضان والبل عشبن عليه من التريبي تفاصيل =والا مثل صباب عامن لنا زل يازين في وقت الربيع التعاليل = ويازين مد الشوف مع نايف التل والقصيده أطول من ذلك
|
||||
|
|
|
18-12-2008, 12:06 PM
|
#12 | ||||
|
رد: خالد مدعث الخرفاني
اونست وسط الجوف نارً بدافور = ان جيت اطفيها تزايد سناها نارً تسابقني على مشت الزور= حتى كلت حدب الضلوع بلضاها اضحك ويطويني مع الضحك حاشور = واكظم واخاف النفس توحي اعداها واصبر على الغربال والضيم والجور = واللى خلق خلقه حشى مانساها ومجبور ابيّن خافي القلب مجبور =مادام ثارت بندقي في خباها يافهد الفزعه ترى الحال مخطور =من علتن محدن محصّل ادواها يامسندي وان جيت ابا ارتاح فالدور = تضيق نفسي من خلاها بخلاها انا اعرف الانسان منهي ومأمور = لكن بقعا ماتكفكف بلاها اخذت لي سجه مع الناس مغرور = ورعً حياته مادرى وش وراها ان احسب الدنيا تمازيح وسرور = واليوم حدتني اليا منتهاها ياوجد حالي وجد من عاش مقهور = وسط السجون اللى خبيثً ابناها خذ له ثمان اسنين فالسجن محسور = مسجون عينه مايغلق بكاها مسجون في دم ً على الكذب والزور= مضلوم لكن حجته مالقاها وقال المنادي بكره السيف مشهور = واقفى و وراعنه ينزع حشاها عليك ياللى فايقً زينة الحور =ادعج غنج كبد المهاوي كواها اسمه سمي الريم بالستر مستور = تسعه وتسعينً حمته بسماها ما قط قيل بداخل السوق مذكور = مصيونةً مادوجت لقصراها معها اشقرً يضرب على الورك منثور = ذيل الاصيل اللى فريدً نباها اصيلةً فالحرب دقولها انجور = لااوحت اطبول الحرب غيّب علاها والعين فيها احراب تسعين طابور=كم قايدة جولً بعينه عماها والخد برّاقً على النو منشور = تجهر عيون اللى يخايل نضاها مليان عوده هايف الخصر مضمور = شربه ملى الفنجال تروي ضماها لو اني ابوي عماها كان ماجور = والا معا ربعه قريب اقرباها واللى مع الاجناب كايد ومصرور = صعبً على خالد يقرّب حماها مير القدر باللوح واللوح مقبور = في صفحةً مافيه حيً قراها ابا اطلب الله واعرف الحظ مذخور= مادري لو ان الحظ يقطف جناها اسهر من المغرب اليا طلعت النور =حقً على نفسي تبين خفاها القصيده صوتياً
|
||||
|
|
|
29-12-2008, 01:00 AM
|
#13 | ||||
|
رد: خالد مدعث الخرفاني
البرق لاح وزان وقت المطاليع = وانا هواجيسي تزاحم ضلوعي نبغى لنا سجه بذيك المرابيع = انا هواي وشف بالي طلوعي روضً خضر فيه الزبيدي مصاليع= فجً خلا مابه من الناس دوعي وريح النفل عقب المطر له ذعاذيع= متخالطن النوار من كل نوعي فيه الحبارى معذّبات المفاريع = و اجوال صيدً فالفيافي رتوعي اسج فيها مع رجالً بواتيع = اصحاب والا من خيار الربوعي وانا موّلع باشقر الريش توليع = شفى مع المقناص حرً بتوعي ابلج عديم يلوّع الصيد تلويع = افجح قصير كراع وصفه يروعي لاماز عمره مزّع السبق تمزيع = من زوعته راعيه خطرن يزوعي اشقر كما لون الذهب له تلاميع = عين الشجيع اللى يضد الجموعي والقصيده اطول من ذلك بكثير
|
||||
|
|
|
13-02-2009, 10:58 PM
|
#14 | ||||
|
رد: خالد مدعث الخرفاني
من مشاركاته بمسابقة شاعر العرب
في دبرة اللى مد الارض وزرجها = وأحيا عليها افواج وافنى بها افواج اما اضرب البيدا ودجها وبجها = والا توجه للبحر واركب الساج بيبان رزق الآدمي مازلجها = ناسً على رزقه لها اضراس واخلاج حث القدم فوق البسيطه ودجها = خل الركايب تطوي البيد بفلاج وعن الدروب العوج عجها ومجها = التايهه بكره لها النور ينباج سقها وبيبان الفخر ماولجها = رجلً يحطونه على الدرب مسهاج غنايم الايام في معتلجها = ومن لايهد ابراج ماشيد ابراج والناس لاتسمع سوالف همجها= لايخلفك عن قمه العز إزعاج الى اخر القصيده أضغط هنا
|
||||
|
|
|
13-04-2010, 12:21 AM
|
#15 | ||||
|
رد: خالد مدعث الخرفاني
ياحمامـه كفّـي الله لا يجـزاتس خيـر=من صلاة الصبح وانتي تجرين النيـاح
كان من جور المحبه غدا شرك شريـر=والله اني ذايـق قبلـك السـم الذحـاح وكان لوعاتك من الوقت ومفارق عشير=والله ان قلبي من فراق خله ماستـراح وكان مفجوعه على فقد عش مستديـر=والله اني فاقد شـوف نجـد والفيـاح من سمعتك ياحمامه وانا ماقـول غيـر=لي متى هذا الشقا واردف الونه صيـاح ماعليك خلاف عنـدك جناحيـن تطيـر=مير انا وشلون ابنزح وانا مالي جنـاح مالي الا اسوق قلبي مع الغربي عصير=واسهر عيوني ليامن شعاع البـرق لاح اتذكـر واتوجـد علـى مافـات ميـر=ماورا زود التوجـاد والذكـرى صـلاح قبلنا شالح توجد على اخـوه الصغيـر=راح اخوه وعقب ماراح ذيب الخيل راح واتوجد وجد من صار شـره مستطيـر=وجد سعدون العواجي على طيور الفلاح كل ليل وعبرتي تبتدي عقـب الاخيـر=تبتليني دمعة العيـن لا حـد الصبـاح والبلا لاصاح قلبي ورا الضلع القصيـر=عوية الذيب المذير مع الحـزم البـراح لابغيت ادله من الهم وانسى واستخيـر=حدني من حده القـوم بزنـود السـلاح من بعد نجد العذيه وانا مانـي بخيـر=التفت لااقفيت عنهـا تلفـات الطيـاح واتثاقل خطوة الرجل واقدامـي تحيـر=وكن صدري باجداته زواريـق الرمـاح ويوم اجيها مثل ورد الضوامي للغديـر=اتعجل في المجـي واتباطـا فالمـراح دبرة الله مجري الفلك فالبحـر الغزيـر=جاري حكمه علينا مثل مجرى الريـاح واتعبتني حاجـة وردتنـي كـل بيـر=وارتو ي هماج والناس يروون القـراح واحدٍ حضه يشيله على شـداد البعيـر=واحدٍ حضه لاشاله تكرسـع ثـم طـاح من ثلاث سنين وانا اتحـرى للبشيـر=والبشير ابطا وانا سدي من البعد بـاح يابشير الخير عجل عسى دربك سفيـر=لا تخلي للسهر جفن عينـي مستبـاح كل يوم نقول بكره يجـي منـك نذيـر=وانقضت لايام والحيل ماصـار اللقـاح ما تورّد جمة البيـر بسلـوك الحريـر=ولا اطلق المسجون هرج التعلل والمزاح مالقينا فالزمن كود مـا يلقـى الفقيـر=طامع فالمال والمال في يديـن شحـاح يدري الله والعرب ما دروا باللي يصيـر=ميرنوحي ياحمامة واجاذبـك النيايـح
|
||||
|
|
 |
«
الموضوع السابق
|
الموضوع التالي
»
| الذين يشاهدون محتوى الموضوع الآن : 1 ( الأعضاء 0 والزوار 1) | |
العرض المتطور
|
|
|
|
|
إعلانات نصية |
| منتديات صحيفة وادي الدواسر الالكترونية | |||
الساعة الآن 12:51 PM
