ردود شعار عنزه

[معلومات العضو نايف النمران]

السلام عليكم ورحمة الله وبركاته

اخواني اعضاء منتدايات الدواسر

زار احدا شيوخ الدواسر قبيلة ولد سليمان من عنزه في مناسبة حفل الشيخ محمد

رمضان العواجي في مدينة الشملي وهو الشيخ محمد حمدان الدوسري

وعند مغادرته بعث قصيده لقبيلة عنزه مشكوراً وجا عليها ردود من بعض شعار عنزه

وقبيلة عنزه تكن كل التقدير والاحترام لقبيلة الدواسر العزيزوه

وقال الشيخ محمد الحمدان هذه القصيده





ورد عليه الشاعر نايف النمران العنزي

سلام مني عـد مـزن المخاييـل = لهـل العلـوم الطيبـه والجميلـه
سلامن احلا من حليب المباهيـل =والذ واطيب مـن قـراح الثميلـه
لهل الوفا والطيب ربعـاً مشاكيـل = اهل المكارم والخـلاق الفضيلـه
دواسراً عنـد اللـوازم حلاحيـل = عدوهم مات الضحى فـي غليلـه
لاجا نهاراً فيه صكت هل الخيـل = وتناخو الشجعان باسـم القبيلـه
وقبس عجاجه بالضحى كنه الليـل = وثار الدخن بين القبيل او قبيلـه
فريس تنطح باللقـا كـل حلحيـل = متحزمينـاً بالسيـوف الصقيلـه
كم شيخ قوماً قدمهم طاح كالميـل = تعشته سـود السبـاع الهزيلـه
والشيخ ابن سعران نعم الرجاجيل = شيخـاً افعولـه كلهـا تستويلـه
يوم السنين الي بها ينقص الكيـل = بيته على درب الطراقـي دليلـه
يفرح الياجوله من البعـد بالحيـل = نفسه مصخرهـا الضيفـه ذليلـه
على الشرف والعز راعي مواصيل = يفزع بجاه ومـال وايـة وسيلـه
يالله عسالـه باليالـي تسهـايـل = الي حضر يـوم الفـرح بالقبيلـه
بحفل العواجي شيخ ربعا مشاكيل = وكلمة نعـم بالشيـخ والله قليلـه
محمد الي بان نجمه كما اسهيـل = الطيب من كـل النواحـي يجيلـه
والله ايبيض وجـه راع التماثيـل = محمـد الحمـدان راع الاصيلـه
الي مدح ربعي على كـل ماقيـل = اقف امامـه واشكـره وادعيلـه
ونا با مثل لابتـي خيـر تمثيـل = الله يجملنـي واجيـب الجميـلـه
ربعي بني وائل من الشـط لنيـل =ومن الفراة الى حـدود الرميلـه
اهل الربـاع محرقيـن المعاميـل = اللابـه الـي مايقـرب دخيـلـه
وحشا ماقول ان القبايل بها ميـل =كلن على حقـه ايدينـه طويلـه
وختامها منـي سلامـاً وتهليـل =مع كـل بيتـاً نختمـه بتهليلـه

ورد الشاعر صعفق الرسلاني العنزي

يامحمد السعــران يابـن الرجـاجيل =يابن الوفا والعز يابن القبيـــــــله
شعرك نسجتــه بالرجال المشاكيل =ومنكم وصلنا يالسنافي جــزيله
بفــراح ربعي والمعاني زرافيـــــــل =بشيوخ تلقاء والثقايل تشيلـــــه
نطاحت الثاقــل كعـــام الغــرابيــــل =عواجية السربه زحـول الدبيـلــه
افعـالهم تشدله القـــوم بالقــــــــيل =وتاريخهم وافي مـع الجمع كيله
يوم الرمك ومصامـــخ الخيل للخـيل =عقاب بالهيجاء يعمــــر سبيــــله
لاصــــاح تمـرج خيلها بالدعـــــامــيل =وعقيد قوم القوم يرتاع حـــــيلـه
حماية الساقه بالضحاء وسود الليل =لهم على ساق المفاخـر نفيلــه
ونتم دواسـر في لقاكم مكـــــاميـل =دخيلكم يرقـد ولاحد[ن] يجيـــله
ياعيال زايد ياعصـــام المــــــداخـيل =وقت اللقاء ولا بوسـط الخميلــه

ورد الشاعر ماضي صبر العنزي

حي القصيد وحي من ينظم القيـل = يامرحبـا ياهـل العلـوم الجزيلـه
اهل الوفاء والطيب روس الرجاجيل =اولاد زايــد طيبـهـا مايبيـلـه
يشهد لها التاريخ من غزوت الفيل = وتفخر بها حدب السيوف الصقيله
واخص ابن سعران رمز المشاكيل = شيخاً وصوفـه بالمشايـخ قليلـه
حلحيل من روس الرجال الحلاحيل = كـل الحمـول الكايـده يرتكيـلـه
محمد الحمـدان ماهـي طهابيـل = خصمه ايلاحان اللقا ويـل ويلـه
ياربعنـا يامعطريـن الفناجـيـل = المدح مثـل الدوسـري يستويلـه
يالدوسري حنا سلايـل اسماعيـل = الله خلقنـا مـن صلايـب خليلـه
احنا الذي ترجح لنـا كفـة الكيـل = وانتم بعد من نفس تلك الفصيلـه
باسمي وباسم مروضة شرد الخيل = نسل العواجـي محتميـن الدبيلـه
وباسم اعنزه وفخاذها بالتفاصيـل = اولاد وائـل عـز مـن ينتميلـه
تزف لك شكراً جميـع المراسيـل = لاعل ابـن سعـران ردي يجيلـه
هذاوصلي عالـم العـدل والميـل = على النبي اللـي دعـا للفضيلـه

ورد الشاعر خلف دغيمان العنزي

بديـة باسـم الله منـش الهماليـل= ا لواحـد الـي كلـنـا نلتجيـلـه
اعوذ بالمعبود عن كـل تضليـل =واسجد الربي واطلبـه وارتجيلـه
ومن بعد ذكره جبة من هاجسي قيل = لاهل المكارم والفعـول الجزيلـه
حي القصيد وحـي راع التماثيـل = محمـد الحمـدان فعلـه دليـلـه
حراً ولـد حـراًَ بعيـد المناويـل =عـن الـردا متعليـن بالطويـلـه
ون قلت ابن سعران شيخاً وحليـل = شيخت عرب ماهي بشيخت نحيلـه
دواسراً لاصار علـم التصاميـل = ا ولاد زايـد متعبيـن الاصيـلـه
ستر العذارى لابسات الخلالخيـل=لا جا نهـارن فيـه شـب الفتيلـه
شيخاً حضر لشيوخ منا مشاكيـل = محمـد الـي لازمـه ينعنيـلـه
نعمن بابو نواف ماهـي تقاويـل = شيخاً ولـد شيخـاً افعولـه نبيلـه
من لابتاً وقت اللقاء تتعب الخيـل = ربعي بني وايل اسيوفـاً صقيلـه
يشهد لنا التاريخ والعلـم تفصيـل = قولـن صحيـح ولانـدور بديلـه
نبذه مـن الواقـع ولاودي اطيـل =ا لمنذريـه يـوم جتنـا دخيـلـه
وغيره كثير وكل فعـل بدواليـل = ولاخير في هرجاً بليـا حصيلـه
ماقل دل وزبـدة الهـرج تقليـل = والهرج يكفي عـن كثيـره قليلـه
وختامها منـي صلاتـاً وتهليـل = على الرسول الي بعث بالفضيلـه

ورد الشاعر مفرح مليحان العنزي

بسم الذي نزل تبارك وتنزيل = المعتني بالكون عدله وميله
نزل على محمد على السان جبريل = نوراً جلا كل الضلام وضليله
مرسي سفينة نوح هازم هل الفيل = يالله عسى نور الهدى نهتديله
ومن بعد ذكر الله نضمة انا القيل = رداً على راع البيوت الجزيله
يامرحبا ترحيبة البدو بالسيل = الي به العطشان يروي صميله
حي الجواب وحي راع المراسيل = حيه عددزملوق عشب الثميله
قيفان تصلح دايماً لتعاليل = الدوسري نظم ابيوتاً جميله
حي الله الي من هل البن والهيل = اولاد زايد كاسبين النفيله
لمحمد الحمدان سيد المقابيل = يمناه في كل المراجل طويله
من لابتاً تعرف على قرح الخيل = كلن خذا المكتوب واقفى بحصيله
واليوم فضل خالق الكون تفضيل =دينن حنيف وكلنا نتنميله
بقيادة التوحيد لاقصر ولاطيل = ومن يجهله يسال اصحاب الفضيله
نوراً سطع بيدين روس الرجاجيل = الي الحمول الكايده ترتكيله
خلايف معزي زحول الرجاجيل = اخوان نوره محتمين الدبيله
وصلات ربي عد وبل الهماليل = على رسولاً يم طيبه رعيله
اعداد ماسجل من الصوت تسجيل = على شفيع الخلق يوم الوسيله

اخواني القايمين على المنتدى تنسيق القصايد غير متاح لي ياليت لو احد نسق القصايد

اكون له ممنون


وتحياتي وتقديري لكم جميعاً


اخوكم نايف النمران

 

 

 

 

[معلومات العضو مبارك الخييلي]

مرحبا مرحبا ومرحبا أخونا نايف بن نمران



حي الرجال وحي ماجاب


ونعم(ن) بك ونعم(ن) بعنزه


لاهنت وصح ألسانك


والله لايهينك


تقبل شكري والتقدير

 

 

 

 

[معلومات العضو شافي القويسي المخاريم]

بيض الله وجهك على الطرح الرئع اخوي نايف
نعم بلابتك الويلان
و اقول للشعار اللي ردو على الشاعر محمد ابن سعران
ماعليكم زود وافين
و تم تنسيق الموضوع
تحيااااااااااااتي

 

 

 

 

[معلومات العضو ابو فهد الغييثي]

لاهنت اخوي نايف على طرح القصائد

وصح السان الشعراء جميعاً

ونعم فيك وبعنزه جميع

تحياااااااااااااتي

 

 

 

 

[معلومات العضو نايف الخييلي]

نايف النمران

صح لسانك ولسان شعار اعنزه هل القصايد المذكوره , والله يعافيك
ويسلمك على ماقدمت والله يديم المحبه بين المسلمين , وونعم والله بـ ربعنا عيال وايل , قبيله عنزه
لها تاريخ شامخ يحق لإبناءها ورجالها الفخر به , وتستاهلون المدح .

أكرر شكري لك

 

 

 

 

[معلومات العضو فيصل بن جزاء]

والنعم مليووون بعيال وايل عنزه يستاهلون المدح والذكر الطيب

وصح لسااان شعار عنزه وكفو ووفو ولاهنت يابن نمران

 

 

 

 

[معلومات العضو ماجد الدوسري]

بيض الله وجه الشيخ ابن سعران على إجابته دعوة قبيلة عنزه وأدام الله افراحها
ويستاهلون عيال وايل المدح وعز الله كفو تاريخهم يشرف ويبيض الوجه
ولاهانوا الشعار على مجاراة الشيخ ابن سعران

 

 

 

 

[معلومات العضو العماني]

الشاعر نايف النمران

صح الله لسانك وشعراء قبيلة عنزه العريقه ، والطيب لايستغرب من هل الطيب

ونعم والله بالويلان ويستاهلون المدح ويستاهل ابن سعران . قصائد جميله ورائعه فسلمت يمناك يالقرم على ايرادها

تقبل تحياتي،،

 

 

 

 

[معلومات العضو ابن شمسان البدراني]

ورد عليه الشاعر نايف النمران العنزي

دواسراً عنـد اللـوازم حلاحيـل = عدوهم مات الضحى فـي غليلـه
لاجا نهاراً فيه صكت هل الخيـل = وتناخو الشجعان باسـم القبيلـه
وقبس عجاجه بالضحى كنه الليـل = وثار الدخن بين القبيل او قبيلـه
فريس تنطح باللقـا كـل حلحيـل = متحزمينـاً بالسيـوف الصقيلـه
كم شيخ قوماً قدمهم طاح كالميـل = تعشته سـود السبـاع الهزيلـه

ورد الشاعر صعفق الرسلاني العنزي

ونتم دواسـر في لقاكم مكـــــاميـل =دخيلكم يرقـد ولاحد[ن] يجيـــله
ياعيال زايد ياعصـــام المــــــداخـيل =وقت اللقاء ولا بوسـط الخميلــه

ورد الشاعر ماضي صبر العنزي

حي القصيد وحي من ينظم القيـل = يامرحبـا ياهـل العلـوم الجزيلـه
اهل الوفاء والطيب روس الرجاجيل =اولاد زايــد طيبـهـا مايبيـلـه
يشهد لها التاريخ من غزوت الفيل = وتفخر بها حدب السيوف الصقيله

ورد الشاعر خلف دغيمان العنزي

دواسراً لاصار علـم التصاميـل = ا ولاد زايـد متعبيـن الاصيـلـه
ستر العذارى لابسات الخلالخيـل=لا جا نهـارن فيـه شـب الفتيلـه

ورد الشاعر مفرح مليحان العنزي

حي الله الي من هل البن والهيل = اولاد زايد كاسبين النفيله
لمحمد الحمدان سيد المقابيل = يمناه في كل المراجل طويله
من لابتاً تعرف على قرح الخيل = كلن خذا المكتوب واقفى بحصيله

بيض الله وجهك ووجيه الشعار .. والنعم والله بعيال وايل


تحياتي ،،،